LAOAG CITY – Umabot iti 58 a tattao ti natay kalpasan a naarinebneb ti nagluganan da a bangka iti Central African Republic.
Basar iti report, umabot iti 300 a tattao ti naglugan iti bangka ken kaadoan kadagitoy ket mapan da makitabon iti pimmusay a kabagyan da.
Nupay kasta, apaman a nakadanun dagiti biktima iti Mpoko river nga asideg iti ciudad ti Bangui ket napasamak ti insidente.
Maipalagip a naipagagangayen ti mapaspasamak a pannakaarinebneb dagiti bangka iti Central African Republic gapu iti kaado dagiti tattao nga aglugan.
Malaksid kadagiti natay ket dinosdosena a sabsabali dagiti nakalasat kalpasan a nakatapwak ken inkarigatan da ti naglangoy a nagpaigid iti baybay.
Sumagmamano kadagiti nakalasat ket manarimaan paylaeng a matamtaming da kadagiti nagduduma nga ospital iti ciudad ti Bangui.
