LAOAG CITY – Naipadalan ti mandatory quarantine dagiti 58 nga empleado ti Governor Roque Ablan Senior Memorial Hospital (GRASMH) ditoy ciudad ti Laoag.
Daytoy ket basar kenni Doctor Roger Braceros, ti mangidadaulo iti GRASMH kalpasan nga adda ti maysa a suspected covid-19 patient a naadmit iti agarop maysa a lawas iti nasao nga ospital.
Segun ti report, kadagupan kadagiti 58 nga empleado ti GRASMH ket innem ti na-iquarantine iti maysa nga hotel iti Barangay 23 ditoy ciudad ti Laoag.
Immunan a nakumpirmaran nga adda ti tallo a pasyente iti ospital a natay ken dagitoy ket kinakwartoan ti maibagbaga a suspected covid-19 patient.
Nupay kasta, iti opisyal nga statement ni Governor Matthew Marcos-Manotoc ket inbatad na nga awan ti kinapudno na a lima ti pimmusay a kinakwartoan ti suspected covid-19 patient no di ket tallo laeng, ken dagiti dua nga agtawen ti 77 ken 89 ket natay gapu iti acute respiratory failure idinto a ti maysa nga agtawen ti 76 ket aneurysm ti nakatayan na.
Naamoan a naiyakar idi martes, Abril 21 ti nasao probable covid-19 patient iti Mariano Marcos Memorial Hospital and Medical Center iti ciudad ti Batac ken dimmalanen ti swab testing ngem maiyur-uray pay laeng ti resulta na.
Iti agdama, ti nasao a suspected covid-19 patient ket naka-incubation gapu ta maipagarop a marigatan nga umanges.
Gapu iti napasamak ket temporaryo a napaserraan ti Department of Medicine iti GRASMH ditoy ciudad.
Rumrumuar a ti suspected covid-19 patient ket agtawen ti 77 a baket, taga Barangay 15 ditoy ciudad ti Laoag ken maipagarop nga adda ti nakapulapol na a naggapo idiay Seattle, USA ngem napasamak daytoy idi pay bolan ti Pebrero.
