LAOAG CITY – Umabot iti 59 a tattao ti natay idinto a nasurok a 100 a sabsabali dagiti nasugatan kalpasan a nauram ti nightclub iti North Macedonia.
Basar iti report, adda ti naiyuswat a konsierto iti Pulse club iti Kocani babaen ti band DNK, ti nalatak nga Hip-Hop Duo iti nadakamat a pagilian.
Naamoan nga umabot iti 1,500 nga indibidual ti napan a nagatendar iti nasao a konsierto.
Mainaig iti daytoy, inrakurak ni Interior Minister Pance Toskovski a basar iti inisyal a report ket rumrumuar a nangrugi ti uram kalpasan nga adda ti nagil-ayab nga intunda ti pyrotechnic devices.
Kabayatanna, iti mensahe ni Prime Minister Hristijan Mickoski, inbatad na a ti napasamak ket maibilang a nakaladladingit nga aldaw para iti Macedonia.
Innayon ti prime minister a ti pannakapukaw iti ado a biag ket saan pulosen a maisubli ken ti marikrikna a sakit dagiti pamilya, loved ones ken papagayam dagiti biktima ket saan pulos a matukod.
