LAOAG CITY – Na-food poison dagiti 59 nga estudyante ken 12 a mangisursuro iti College of Computing and Information Sciences (CCIS) iti Mariano Marcos State University iti ciudad ti Batac.
Daytoy ti kinumpirmaran ni Dr. Saturnina Nisperos ti Dean ti nasao a kolehiyo.
Inlawlawagna nga idi Dominggo, Nobiembre 3, nagpraktis dagiti estudyante para iti mapaspasangasangan a University Games.
Kagiddan iti daytoy ket nag-order da ti lunch iti supplier-da nga chicken afritada ken adobo a sitaw nga agbalor ti 14,000 pesos, ngem apaman a nagrabii ditoy a nakapasarda ti panagsakit ti buksit no sadinno nga uppat nga estudyante ken maysa a mangisursuro ti nai-confine.
Patien dagiti biktima a ti taraon nga inorder da ti rason no apay a nakapasarda ti panagsakit ti buksit sipud ta maipagarup nga adda ti naidumduma nga angot ti inpaunegda a chicken afritada.
Nu pay kasta, nakasarsarita metten ti supplier dagiti nagbalin a biktima ken inmmanugotda a makipagkooperar iti imbestigasyon ti pannakasabidong dagiti estudyante ken mangisursuro.
Malaksid iti daytoy ket inmannugot pay ti supplier a tumulong iti medical bills dagiti biktima.
Iti agdama ket nakaruaren iti balay pagagasan dagiti uppat a nai-confine nga estudyante ngem ti mangisursuro ket agrekrekobre pay laeng.
