LAOAG CITY – Umabot iti 591 a personnel ti Philippine National Police ti maiwaras nga agbantay para iti pannakaiyuswat ti Bagong Pilipinas, Serbisyo Fair ditoy ciudad ti Laoag a mangrugi intono bigat, Setyembre 23 agingga iti 24 ita a tawen.
Daytoy ti inbatad ni Police Lt. Col. Joseph Baltazar, ti chief of police ditoy ciudad ti Laoag.
Segun ken ni Baltazar, naiget ti panagbantay dagiti kameng ti pulisya kadagiti venues kangrunaan na iti Mariano Marcos State University-Laoag Campus ken iti centennial arena.
Inpakaammo ni Baltazar nga adda dagiti color coding dagiti kayat a gundawayan dagiti aplikante a serbisyo.
Mainaig iti daytoy, kuna ni Baltazar a silulukat iti kampo a mapan pagparkingan dagiti makipagpaset iti programa ken awan ti pagdanagan dagiti maseknan gapu ta adda dagiti truck a pagluganan da a libre nga agturong iti venue.
Naamoan nga adda ti nasurok nga 60 a government services a mabalin a gundawayan dagiti residente ditoy probinsya mangrugi iti oras ti alas-siete ita a bigat.
