LAOAG CITY – Nakuriente ti innem a construction workers iti Barangay Tapao-tigue iti ili ti Currimao no sadinno a dua kadagitoy ket natay.
Nabigbig dagiti dua a pimmusay nga isuda Lawrence Albino, agtawen ti 45, awanan asawa ken residente ti Barangay Torre iti ili ti Currimao ken Christopher Queddeng, agtawen ti 47, awanan asawa ken residente ti Barangay Gaang iti nasao nga ili.
Nabigbig met dagiti uppat a dadduma pay a kaduada a manarimaan nga agpapaagas iti ospital nga isuda Rogelio Cardenas, Albert Comamo, Dexter Bagarino ken Kalyl Antipolo nga agpapada nga adda iti umno a tawen ken residente dagitoy iti ili ti Currimao.
Segun ken ni P/Cpt. Melvin Soriano, Hepe ti Currimao Municipal Police Station, kabayatan nga iyak-akar dagiti maseknan a construction workers ti four layered scaffolding nga usarenda a pagbatayan para iti manarimaan a construction warehouse idi a kellaat a natulid ken aksidente a nasagidda ti 3 phase primary line wenno ti live wire a nangitunda ti pannakakurienteda.
Gapu iti daytoy, naideklarar a dead on spot da Albino ken Queddeng babaen ti attending physician a ni Dr. Addielou Fidelfio Abad idinto a dagiti dadduma a biktima ket naitaray iti Mariano Marcos Memorial Hospital and Medical Center iti siudad ti Batac para iti pannakatamingda.
Naammoan a dimket ti dua a construction workers iti scaffolding idinto a dagiti dadduma ket naipurwak.
Kabayatanna, inpasingked ni Mayor Edward Quilala iti ili ti Currimao a maipaayan ti tulong dagiti pamilia dagiti nasao a biktima.
