LAOAG CITY – Umabot iti innem a gunglo dagiti mannalon ditoy probinsia ti natulungan ti Provincial Agriculture Office a nagbiruk kadagiti institutional buyers a nanggatang kadagiti produkto da manipud idi bulan ti Enero agingga idi Marso ita a tawen.
Naammoan a dakkel ti naitulong dagiti agserserbi iti Provincial Agriculture Office a naidestino iti Ilocos Norte Agricultural Trading Center wenno iti Bagsakan Center iti siudad ti Batac.
Karaman kadagiti natulungan a gunglo dagiti mannalon ti Bacarra Zanjera Irrigators MPC, Zanjera Naganakan Farmers Association, Inc. ken Zanjera Nagcarsuan Farmers Association, Inc. iti ili a Sarrat, Pasuquin Onion Growers Agriculture Cooperative ken San Juan Icas Maumel Farmers Association ti ili a Pasuquin ken ti Bacarra Multi Purpose Cooperative.
Balligi a naikonektar ti probinsia ti Bacarra Zanjera Irrigators MPC iti Dizon Frams/Global Fresh Products, Inc. a nangitunda iti pannakailako da iti produkto da a bawang nga agdagsen ti dua ribu siyam a gasut limapulo ket lima a kilo iti uppat a gasut innem a pulo ket dua ribu dua gasut ken walo a pisos kalpasan a nailako iti sanga gasut limapulo agingga ti sanga gasut innem a pulo a pisos iti kada kilo ti nasao a produkto.
Malaksid iti produkto a bawang, naiyasideg da kadagiti dua a gunglo dagiti mannalon ti ili a Sarrat a nangilako kadagiti produkto da a kamatis iti Tosen Foods Corporation.
Agdagup ti 1,140,805.08 ti naglakoan ti Zanjera Naganakan Farmers Association, Inc. idinto nga uppat a gasut tallopulo ket siyam a ribu innem a pulo ket innem a pisos ken duapulo a sentimos ti Zanjera Nagcarsuan Farmers Association, Inc.
