LAOAG CITY – Inbatad ni Mrs. Janet Retamal, ti mangidadaulo iti Commission on Population ditoy ciudad ti Laoag nga addan iti 6 a kaso ti teenage pregnancy a nairekord iti opisina da ita a tawen.
Segun kenni Retamal, ti kaubingan a nasapa a nagsikog a nairekord da ket agtawen iti 15.
Kunana a sumagmamano kadagiti rason iti kaadda ti kaso ti teenage pregnancy ditoy ciudad ket ti kinakurang ti parental guidance rason a sabali ti ugali dagiti dadduma, exposed da kadagiti nagduduma a social activities no sadinno malipatan da dagiti balakad dagiti nagannak kadakuada, mabalin nga impluwensya dagiti barkada, ken kurang ti sexuality awareness da.
Nupay kasta, kunana nga agtultuloy ti interventions nga ar-aramiden iti opisina da tapno masolusyonan ti problema dagiti agtutubo.
Mainaig iti daytoy, kagiddan ti women’s month ket maisuro kadagiti agtutubo manipod kadagiti nagduduma a pagadalan ti awareness maipapan ti panagsikog pakairamanan ti self defense gapo ta iti napalabas a tawen ket adda dagiti narekord a panagabuso kadagiti babbai.
Kabayatanna, kuna ni Retamal nga adda ti Social Protection Program nga iyus-uswat da para kadagiti adolescent mothers ken dagiti annak da, ken tapno matulungan dagitoy pakairamanan dagiti partners da ken dagiti nagannak kadakuada babaen iti pannakaipaay ti financial assistance.
Malaksid iti daytoy, adda pay ti Comprehensive Sexuality Education nga ipatpatungpal da kadua da ti Department of Education.
