LAOAG CITY – Maysa nga innem nga agkakabsat iti Missouri, U.S. ti nakagun-od ti world record gapu ta no mapagtitipon dagiti tawenda ket dumanon iti 571 years old.
Kinumpirmaran ti records keeping organization a Guinness World Records a ti Overall sisters ti baro a record holder ti titulo nga “Highest Combined Age of Six Living Siblings” gapu iti kombinasion dagiti tawenda a dumanon iti 571 years and 293 days old.
Naammoan a dagiti tawen dagiti agkakabast ket 88 agingga 101. Iti siam a dekada a nagkakaduada ket adu dagiti napapateg a napasamak iti world history ti napasaranda kas ti Great Depression, World War II ken ti COVID-19 pandemic.
Basar kadagiti agkakabsat, sobra a close dagitoy iti tunggal maysa ken no adda ti agpauyo kadakuada ket dagusda met laeng nga agpadispensar.
Adda ti inauna a kabsatda nga agtawen koman ti 102 ita a tawen ngem pimmusay daytoy iti tawenna 81.
Gapu iti kinataeng dagitoyen nga agkakabsat, kalikagumda a kankanayun nga agkikitada ken agbakasion kadagiti nagduduma a lugar sakbay nga adda ti matay kadakuada.
