LAOAG CITY – Tiniliw dagiti kameng ti Philippine National Police (PNP) iti panangidaulo ni Police Major Christian Felix, ti chief of police iti ili ti Marcos dagiti innem nga indibidual gapu iti illegal a panagsusugal da iti Barangay Escoda iti nasao nga ili.
Inbatad ni Felix a maysa kadagiti natiliw da a nagsusugal ket menor de edad a lalaki, grade 11 student.
Segun ken ni Felix, adda ti naawat da nga impormasyon mainaig iti panagsusugal dagiti suspek isut gapuna a nangisayangkat da ti operasyon.
Inpakaammo na nga iti panagresponde da iti lugar ket naaktwan da dagiti suspek nga agay-ayam ti ‘’pusoy dos’’.
Nakumpiskar da iti umuna a lamisaan ti maysa a set ti baraha a saan pay a nalukatan, maysa a set ti baraha nga inusar dagiti suspek, lamisaan nga agmaris ti berde, arpaw ti lamisaan nga agmaris ti puraw, innem a tugaw, maysa a pinggan nga adda karga na nga 40 a pisos, ken ti P423 a pisos.
Kabayatanna, iti met maikadwa a lamisaan ket nakakumpiskar dagiti otoridad ti puraw a table cloth, plastik a lamisaan, uppat a tugaw ken 320 a pisos idinto a ti maikatlo a lamisaan ket adda met ti naala dagiti kameng ti pulisya a maysa a set ti baraha a saan pay a nalukatan, maysa a lamisaan, lima a tugaw ken 130 a pisos.
Iti agdama, nagtalinaed dagiti suspek iti kustodyar ti PNP iti ili ti Marcos kabayatan a maisagsagana ti reklamo a maipila kontra kadakuada.
