LAOAG CITY – Innem pay a personalidad ti isaruno ken ni Sen. Bato dela Rosa nga isyuan ti arrest warrant ti International Criminal Court (ICC) nga iparuk-at kadagiti sumarsaruno nga aldaw.
Daytoy ti inrakurak ni National Bureau of Investigation (NBI) Director Melvin Matibag a kunana pay a ti panangarestar ken ni Bato ket ibilanda a ‘test case’ kadagiti operatibada.
Ni dela Rosa a dati a PNP chief ti ikonkonsiderar a chief architect iti nadara a drug war ni dati a Presidente Rodrigo Duterte idinto a ti innem a dadduma pay a nalalatak a personalidad ket karaman iti extra judicial killings (EJK) iti drug war.
Kuna ni Matibag, saan nga agbayag ket matiliwto ni Dela Rosa babaen ti NBI operatives gapu ta addan ti sursurotenda a lead iti paglemlemmenganna.
