LAOAG CITY – Inbatad ni Ombudsman Jesus Crispin Remulla nga umabot iti agarop 600 a bilyon a pisos ti pukaw ti gobierno gapo iti pannakaibasura dagiti nagduduma a kaso iti korte gapo iti “inordinate delay” iti prosecution.
Segun kenni Remulla, makapaalarma daytoy ken nasken a maisardeng ti kastoy a sitwasyon gapo ta masapol nga adda ti wagas tapno mapagsungbat dagiti responsable kadagiti krimen.
Inlawlawag na a ti 600 a bilyon a pisos ket iti las-ud ti 15 a tawen ken mabalin a ti problema ket ti dilatory tactics babaen kadagiti defense lawyers tapno apaatiddog ti trial, ken kaadoan kadagitoy ket graft cases.
Kunana a gapo iti daytoy ket kalikagom na a maipababa ti panawen iti panagtingiting no ti kaso ket dismissible – manipud 72 hours ket agbalin a 48 hours tapno maliklikan ti political theatrics.
Malaksid iti daytoy, makissayan pay ti allowable one year ken mapagbalin laeng a 60 days no sadinno ti fact-finding phase ket malimitaran met laeng iti 60 nga aldaw.
