LAOAG CITY – Umaboten iti 600 a tattao ti natay ken nasurok 100 ti matataming iti ospital kalpasanti panagsagaba da ti sugat gapo iti idadayyeg ti magnitude 6.0 a gingined idiay Afghanistan.
Napasamak ti gingined iti daya a paset ti Afghanistan ken asideg iti border na iti pagilyan a Pakistan.
Naguneg ti 8km ken ti sentro na ket 27km ti kadayo na iti Jalalabad no sadinno nairekord pay ti sumagmamano nga aftershocks a nagpigsa iti 4.5 agingga iti 5.2 magnitude.
Basar iti report, dagiti pimmusay ket manipud kadagiti probinsya ti Nangarhar ken Kunar.
Kabayatanna, nagkiddaw ti gobierno ti Taliban kadagiti aid organizations iti dagus a pannakaipaay ti tulong nangruna ket narigat a madanon iti mismo a lugar gapo ta naserraan dagiti dalan kalpasan met ti panagreggaay ti daga, ken gapo kadagit aftershocks.
Segun iti police chief ti Kunar province, ti kaalistoan a pannakaiyuswat ti rescue operations ket babaen iti helicopter.
Kuna ti Taliban nga addaan da laeng ti limitado a resources isut gapo na a nagkiddaw ti tulong international organisations para iti helicopters tapno madanon dagiti apektado a lugar.
