LAOAG CITY – Inpakaamo ni Mayor Joefrey Saguid iti ili ti Dingras nga agtultuloy ti pannakaipadalan ti swab testing dagiti nakapulapol ni IN-C795, lalaki nga agtawen ti 52 ken residente iti Brgy. Lumbad iti nasao nga ili.
Inbatad ni Saguid a manipod iti 61 a nadeterminar a primary contact ti pasyente ket addan ti dimmalan iti testing a 37.
Immuna iti daytoy, inlawalwag ti Mayor nga adda ti inatendaran a pasken ni IN-C795 ken agpapaay kas pintor.
Inbatad na a naamoan a nagpositibo ti virus ni IN-C795 kalpasan a dimmalan iti testing apaman a naipan iti ospital gapu iti pannakapasar na ti high blood pressure.
Iti agdama, kuna ni Saguid a naka-isolate amin a nakapulapol ti pasyente ken naipan iti lockdown ti sumagmamano a pagtaengan iti Sitio 4 ken Sitio 5 iti Brgy. Lumbad.
Nagpalagip ti mayor a kanayun a suruten dagiti pagganurutan kontra ti covid-19 tapno maliklikan ti ad-adda a panagwaras ti virus.
