LAOAG CITY – Nairugin ti pannakaipasdek ti innem a pulo ket dua a “housing units” a paset iti phase 2 ti Provincial Government Housing Project nga ad-adda a nalatak iti awag nga Adigi Homes.
Segun ken ni Mrs. Evalaudia Duyor, Provincial Assssor ti Provincial Government of Ilocos Norte, maisayangkat a dagus ti “ground breaking” apaman nga adda ti dua a units a malpas.
Inlawlawagna a basar iti pannakisarsaritana iti “liaison officer” ti contractor, puntiriada a maileppas iti umuna a paset ti bulan ti Enero wenno agingga iti maikadua a lawas ti Enero ti dua a kumpleto a “model units”.
Namnamaen ni Duyor a matungpal daytoy a rakurak ti “liaison officer” tapno agbalin a nakallalagip ti umuna a panagkasangay ni Gob. Cecilia Araneta Marcos iti panagbalinnan a gobernador ti Ilocos Norte.
Impalgakna a kadagupan dagiti 62 a units ket addan ti tallopulo a nagpareserba.
Mainaig iti daytoy, kunana a mabalin pay laeng dagiti interesado ti agaplikar a mangala ti unit da iti babaen ti phase 2 ti nasao a proyekto.
Kabayatanna, inpakaammo ni Duyor nga agtultuloy ti pannakaipatungpal ti Adigi Phase 1 agsipud ta adu pay laeng dagiti agap-aplikar iti daytoy.
Inbatadna nga ad-adda a ti “adigi phase 2” ti iyaw-awis da a apagaplikaran dagiti kakailian agsipud ta napinpintas ti modelona gapu ta namodmoderno ngem adda met latta dagiti kaykayat da ti “Adigi Phase 1”.
