LAOAG CITY – Umabot iti 62 a kaso ti teenage pregnancy ti nairekord idi 2024 ditoy ciudad ti Laoag, nangatngato no ikompara iti 59 a kaso idi 2023.
Daytoy ti inrakurak ni Mrs.Janet Cony Retamal, ti mangidadaulo iti Population and Development Office iti gobierno lokal ditoy ciudad ti Laoag.
Segun ken ni Retamal, ti kaubingan a nagsikog ditoy ciudad iti napalabas a tawen ket agtawen laeng ti 13.
Gapu iti daytoy, nagpalagip ni Retamal kadagiti nagannak a masapol a bantayan da a naimbag dagiti annak da ita a bolan a panangselebrar ti Valentine’s day.
Kuna na a responsibilidad dagiti nagannak nga amwen ti pagturturungan dagiti annak ken no siasinno dagiti kadkadwa da.
Mainaig iti daytoy, kuna ni Retamal nga iti agdama ket maysa kadagiti prayoridad ti gobierno lokal ditoy ciudad ket ti mangsolbar ti agtultuloy a panagngato ti kaso ti teenage pregnancy, saan laeng a ditoy ciudad no di ket iti intero a pagilian.
Inpalgak ni Retamal a basar iti obserbasyon ti Population and Development Office ket ado dagiti agtutubo a makalipat iti limitasyon da gapu kadagiti makitkita da iti aglawlaw, aglalo ti impluwensya ti barkada.
Mamati ni Retamal nga iti kaaldawan ti Valentine’s Day ket ado manen dagiti agkakarelasyon nga agtutubo nga agplanplano a rumuar a possible a pakaaramidan da ti saan pay a rebbeng nga aramiden da aglalo no aginom dagitoy ti arak.
Iti agdama, inpakaammo ni Retamal nga addan ti ipatpatungpal a panagbisita ti gobierno lokal iti nagduduma a pagadalan iti man pribado man wenno iti pampubliko tapno mangiyuswat ti awareness campaign a makatulong kadagiti ubbing.
Innayon na a naiget pay ti pannakikamayet ti Population and Development Office iti nagduduma nga organisasyon para iti iwaywayat da ng tapno mangbuwangay kadagiti programa nga epektibo a pangsolbar iti panagsikog ken panagbalin nga ina dagiti ubbing gapu ta saan pay a nakasagana dagitoy.
Kabayatanna, kiniddaw pay ni Retamal kadagiti opisyal ti barangay a paigetan da ti maipatpatungpal a curfew tapno masigurado nga awanen dagiti agtutubo a rumuar iti oras ti alas-dyes ti rabii agingga na iti alas-singko ti bigat.
