LAOAG CITY – Kinumpirmaran ni Mr. Ronald Estavillo, manager iti Laoag International Airport a ti residente iti Brgy. Salet-Bulangon ditoy siudad ti Laoag wenno ni IN-C233 ket agpapaay kas guwardya iti Laoag International Airport (LIA).
Gapu iti daytoy, kuna na a dagus a naiyuswat ti contact tracing kadagiti nakapulapol na.
Inbatad na nga 66 ti adda listaan a nakapulapol ni IN-C233 a naisubmitir iti City Health Office ken dagitoy ti manamnama a dumalan iti swab test.
Kuna na a kaadwan kadagiti nailista a close contact na ket dagiti kakadwa na a gwardya iti admin building pakairamanan dagiti dadduma nga empelado ken dagiti agpapaay iti maintenance section.
Mainaig iti daytoy, inpakaamo ni Estavillo nga addan ti naiwayuswat a disinfection ken namandaran dagiti close contacts ni IN-C233 nga ag-isolate.
Innayun na a work from home ti wagas ti panagtrabaho dagiti empleado ken awan ti flights.
Maipalagip a ni IN-C233 ket nagpositibo iti virus kalpasan a nakapulapol na ni IN-C209 nga empleado iti Ilocos Norte Provincial Jail (INPJ).
