LAOAG CITY – Natiliw ti maysa a lalaki iti naiyuswat a checkpoint operation dagiti kameng ti PNP-Dingras kalpasan a nakumpiskar da ti paltog ken sumagmamano a bala manipod iti maysa a lugan na idiay ili ti Dingras.
Binigbig ni Police Captain Joseph Calderon, ti hepe ti PNP Dingras ti suspek a ni Zyrel Rex Lasiste y Sampayan, agtawen ti 38, ken residente ti Barangay Guiset Sur, San Manuel Pangasinan, ken dati nga agnanaed idiay Amerika ngem naideport ditoy pagilian gapu ti kaso a direct assault.
Segun ti imbestigasyon ti PNP, immunan a naireport kadagiti kameng ti PNP ditoy probinsya ti Toyota Innova a nagluganan ni Sampayan kalpasan nga intarayan na iti nadungpar na ditoy ciudad ti Laoag.
Innayon pay ni Calderon a bayat ti panag-checkpoint da idiay Ili ti Dingras ket dita a natiliw da iti nasao a suspek.
Nakumpiskar dagiti kameng ti PNP – Dingras dagiti 30 a bala a nakaikabil ti sikigan ti driver’s seat, kalibre 40 a nakaikabil ti compartment ti nasao a lugan, ken nakaisuot pay kenkuana iti bulletproof vest.
Kabayatana, naamoan a ti nasao a lugan ket inlibas na laeng manipod iti nagannak na idiay Pangasinan, ken agturong kuma ni Sampayan idiay ili ti Pagudpud ngem naiyaw-awan.
Naipakaammo metten daytoy kadagiti nagannak ti suspek idiay Pangasinan ket maiyu-uray da laengen nga agkamang iti PNP.
Iti agdama, maisagsaganan ti maipila a kaso a panaglabsing ti Comelec Gun Ban ken RA 10591 kontra ti nasao a suspek.
