LAOAG CITY – Manamnama a mapilaan ti maysa nga ama ti kaso nga attempted homicide ken panaglabsing ti RA 10591 wenno Illegal Possession of Firearms and Ammunition iti Dingras, Ilocos Norte.
Nabigbig ti suspek a ni Honesto Alog, 60, naasawaan ken residente ti Brgy. Medina iti nasao nga ili.
Basar iti imbestigasyon ti PNP Dingras, dimmatag iti kwerpo ti pulisya ti anak ni Alog a ni Cristo Rey Alog, 33, naasawaan, mannalon ken residente iti nasao nga ili kalpasan a pinaltugan ti ama na ngem saan a natamaan.
Naamoan a dumawat kuma iti suspek ti kwarta iti anak na nga umabot iti 20 a ribo a pisos kalpasan a naglako ti truck tapno igatang na ti motorsiklo na ngem saan nga inikkan ti baro na.
Gapu iti daytoy, napan naginom ti suspek ken kalpasan a nabartek ket napan na kinomprontar ti anak na bitbit na ti maysa a paltog.
Immuna a binakal ti ama ti anak na kalpasan na ket pinaltugan na ngem saan a natamaan.
Insigida a nagresponde dagiti kameng ti pulisya ken narekobre da ti kalibre 38 a paltog nga addaan ti 4 a bala.
Iti agdama, nagtalinaed iti kustodyar ti PNP Dingras ti nasao a suspek.
