LAOAG CITY – Umabot it 68 nga species ti billit ti nairekord kadagiti kabanbantayan iti Nueva Vizcaya, a mangipakpakita ti nabaknang a biodiversity ti lugar.
Basar iti Department of Environment and Natural Resources (DENR) Cagayan Valley, nangiwayat ti Provincial Tourism and Culture Office ken ti Wild Bird Photographers ti bird census idiay Santa Fe, Kasibu, Dupax, Bayombong ken Diadi.
Iti nairekord nga 68 nga species, 47 kadagitoy ti endemic wenno makita laeng ditoy Pilipinas, 17 ti resident species ken uppat met ti migratory birds.
Mainaig iti daytoy, kalikagum ti nasao a census a maamoan dagiti posible a lugar a pakaisayangkatan ti bird watching iti lugar.
Karaman kadagti endemic species a nakita ket ti Philippine Bush Warbler, Blue-headed Hantail, Elegant Tit ken ti Handsome Sunbird.
Kabayatanna, naiwayat ti census kas paset ti panagsagsagana para iti 2027 Grey-faced Buzzard Summit a maisayangkat into Marso. no sadinno manamnama nga agatendar ditoy dagiti conservationist, birdwatcher ken government officials tapno talantanenda dagiti umno a panangprotehir kadagiti migratory birds ken para iti programada a sustainable ecotourism.
