Saan a panagsagana iti gubat ti mapaspasamak a Balikatan joint military exercises iti nagbaetan ti Pilipinas ken America.
Daytoy ti impaganetget ni Nantional Security Council Assistant Director General Jonathan Malaya iti maysa a News forum idi Abril 20.
Daytoy a panagrang-ay ket umay ti maysa nga aldaw kalpasan nga inyebkas ti China ti dakkel a pannakaseknanna iti panangipatulod ti United States iti medium-range missile system iti amianan a Luzon.
Immuna nga inbaga ni Balikatan 2024 Executive Agent Colonel Mike Logico a maisayangkat ti military exercises iti nagbaetan ti America ken pagilian iti amianan a Luzon gapu asideg daytoy iti Taiwan a posible a pagtaudan ti rinnupak iti China.
Segun kenkuana, ti panggep no apay nga adda armed forces ket tapnu agsagana iti gubat adda man wenno awan ti China ket kinunana a maisayangkat latta dagiti military exercises.
Inbatad ni Malaya nga awan ti plano ti Pilipinas a makiraman iti aniaman a klase ti rinnupak.
Inpasigurado ti opisyal ti National Security Council a ti Balikatan, a mangrugi inton Lunes, Abril 22 agingga iti Mayo 20, ket naipamaysa iti pannakapapigsa ti kapasidad ti depensa ti pagilian kasta met ti panagtitinnulong dagiti puersa ti Pilipinas ken Amerika.
Nasurok a 16,000 a tropa ti Pilipinas ken Estados Unidos ti manamnama a makipaset iti Balikatan exercise ita a tawen.
