LAOAG CITY – Ballaigi a naarestar iti maysa a mekaniko iti naisayangkat nga Anti-Illegal Drug Buy-Bust Operation iti McKinley Sreet iti Brgy. 10 ditoy siudad.

Nabigbig ti suspek ti operasion a ni William Santos, agtawen ti 49, naasawaan, mekaniko iti maysa a motoshop ken residente iti Brgy. 8 San Matias ditoy cuidad .

Natiliw ti suspek kalpasan a nagilako ti maysa nga heat-sealed transparent plastic sachet a naglaon ti maipagarup a shabu iti maysa a pulis a nagpammaraang kas poseur-buyer.

Nakumpiskar dagiti otoridad manipod iti suspek ti 5 nga heat-sealed transparent plastic sachets a maipagarup a shabu nga agdagsen ti agarop 2.1 grams ken agbalor ti P14,280.

Malaksid iti daytoy, nakumpiskar pay manipud iti suspek ti maysa a ribu a pisos a nausar kas buy-bust money, maysa nga andriod phone, maysa a pouch, dua a key chain,  P2,100 a cash money ken maysa a US dollar.

Naammoan a ti suspek ket maibilang nga Street Level Individual, natiliw idi tawen 2022 ken Drug Surrenderee idi tawen 2020. 

Nupay kasta, nagkedked daytoy a mangipaay ti komento mainaig iti naisayangkat nga operasion.

Kabayatanna, nagtalinaed iti kustodiar ti Philippine National Police ditoy cuidad ti suspek ken manamnama a sumnago iti kaso a panaglabsing iti Comprehensive Dangerous Drugs Act of 2002.