LAOAG CITY – Natay ti pito a climbers gapu iti Nepal avalanche.
Basar iti expedition agency Seven Summit Treks, karaman kadagiti pimmusay ket ti lima a gangannaet ken dua a Nepalis kalpasan a nakapasarda ti avalanche wenno ti napuskol a niebe iti Himalayan peak iti north-eastern Nepal.
Napasamak ti insidente iti asideg ti base camp ti kabanbantayan ti Yalung Ri iti Dolakha district.
Nabirukan ti dua a bangkay dagiti rescuers idinto a manarimaan pay laeng ti panangbiruk kadagiti lima a dadduma pay a mapapati a nagaburan ti niebe.
Manarimaan ti pannakataming dagiti walo nga indibidual a na-rescue dagiti otoridad iti kabisera ti Kathmandu kalpasan a nagsagaba dagitoy ti sugat.
Segun ken ni Mingma Sherpa, Chairman ti Seven Summit Treks, dagiti bangkay ti lima nga indibidual ket posible a nagaburan ti niebe nga adda ti kaunegna a 10 agingga 15 a kadapan.
Inbatadna a dagiti natay ket pakairamanan ti dua nga Italian, Canadian, German, French ken dua a Nepalis a nagserbi a nangbayabay kadagiti climbers.
Mainaig iti daytoy, inpakaammo ni Local Deputy Superintendent ti Police Gyan Kumar Mahato, ti rescue helicopter ket nag-landing iti Na Gaun area ti Dolakha a lima nga oras a mapagpagna manipud iti Yalung Ri base camp.
Inlawlawagna a basar ti maysa kadagiti nasugatan a climbers ket namin-adu a daras dagitoy a nagkiddaw ti tulong ngem nabayag a simmangpet dagiti rescuers iti lugar.
Naammoan a ti grupo ket agsagsagana nga umuli iti asideg ti Dolma Khang peak nga adda ti kangatona a 6,332m wenno 20,774ft no sadinno a planoda nga umuli iti 5,630m iti Yalung Ri kas paset ti acclimatization schedule-da.
