LAOAG CITY – Namnamaen ti Philippine Statistics Authority a maaddaan ti nababbaba a presio ti bagas iti merkado iti panagkissay ti taripa iti imported a bagas.
Daytoy ti inbatad ni Philippine Statistics Authority Chief Dennis Claire Mapa maipapan iti panangited ti go signal ni Presidente Ferdinand Marcos Jr. tapno makissayaan ti taripa ti imported a bagas ti agingga iti 15% manipod iti agdama a maipakpakat a 35%.
Inbatad ni Mapa a dumanon iti P6 aginga iti P7 iti kada kilo ti bagas ti posible nga agbalin a kissay a marikna dagiti umili.
Inlawlawagna a mangitunda daytoy ti nababbaba a rice inflation nga isu ti kangrunaan a makatultulong iti inflation iti pagilian.
Nupay kasta, kuna ni Mapa a kasapulan latta a bantayan dagiti sumagmamano a factors kas ti nangato a panagsukat ti piso iti dolyar a mabalin a makaapektar iti presio ti bagas.
Iti monitoring met ti Philippine Statistics Authority, agtultuloy ti panagbaba ti average a presio ti bagas kadagiti merkado ken pakairamanan ti world market a bumabbaba met dagiti presio.
