LAOAG CITY – Arigna saanen a malapdan ti Senate committee on Women, Children, Family Relations and Gender Equality ti panangibabawi da ti pirma da iti committee report iti nailungalong nga anti-teenage pregnancy bill a bumarbara a debate iti Senado kalpasan a kontraen ti sumagmamano a religious groups.
Naduktalan nga umaboten iti uppat a senador ti nangibabawi iti pirma da iti committee report seknan iti nailungalong a gakat gapu ta agamak da iti pressure ti sumagmamano a religious community iti sexuality education provisions.
Iti surat ken ni Senate President Francis Escudero a napetsaan ti Enero 21, 2025, inbabawi ti pirma da Senador JV Ejercito, Cynthia Villar, Nancy Binay, ken Bong Go.
Kiniddaw da kenni Escudero nga ibabawi da ti pirma da kas suporta iti report “in light of the recent feedback and numerous concerns.”
Kagiddan iti daytoy, inrakurak met ni Senador Juan Migiuel “Migz” Zubiri ti panangkontra na iti nailungalong a gakat a mangisuro ti sex education bayat a naganus paylaeng ti panunot dagiti ubbing tapno maliklikan ti teenage pregnancy kas maiyataday iti gagem ti United Nations.
Inpetteng ni Zubiri a kas maysa a konserbatibo nga agpanpanday linteg ken nagannak ket naiget a kontraen na ti sumagmamano a linaon ti probisyon ti Senate Bill No. 1979.
Nupay kasta, inlawlawag ni Zubiri a bigbigen na ti napintas nga intensyon ni Senador Risa Hontiveros iti panagpila na ti nasao a gakat ken maawatan na ti gagem ti senadora a mangipaay ti suporta kadagiti agtutubo nga inna ken solusyonan ti adolescent pregnancy.
Innayon ni Zubiri a kas pro-life, pro-family ken pro-God legislator, mamati a masapol a pagtalinaeden ti responsibilidad iti sexual education dagiti nagannak ken saan nga iti pagadalan.
