LAOAG CITY – Nagballaag ti Deparment of Health iti publiko a ti nabayag a pannakaibilag iti nangato a temperatura ket makapatay.
Ti pakdaar ti nasao nga ahensia ket gapu iti baet ti kumarkaro a kinapudot ti paniempo nga ad-adda pay a napasaran iti naglabas nga aldaw manipod idi Enero 1 agingga Abril 29, no sadino ti Deparment of Health ket nakairekord ti 77 a kaso ti heat-related illnesses maibasar iti kaudian a datos.
Basar iti Deparment of Health, 67 kadagiti 77 a kaso ket agtawen iti nagbaetan ti 12 agingga 21 wenno ti age group dagiti agad-adal.
Iti pakabuklan, pito ti naipadamag a pimmusay ngem inlawlawag ti departamento nga agtultuloy pay laeng ti panangalada kadagiti datos.
Naammoan a ti pannakatay ket gapu iti sakit nga adda iti pakainaiganna iti init pakairamanan ti heatstroke wenno “heat-influenced” kas kadagiti tattao nga addaan ti sakit iti puso a mangpakaro pay iti kinapudot iti aglawlaw nga agresulta iti nangato a presyon ti dara.
Iti agdama, nairekord ti kangatoan nga heat index iti 53ºC idiay Iba, Zambales, idi Abril 28 idinto a ti kangatoan nga heat index idiay Metro Manila ket nakairekord ti 46ºC idiay Pasay City idi Abril 24.
