LAOAG CITY – Natay ti pito nga indibidual iti Cargo plane crash idiay Kentucky airport.
Daytoy ket apaman a naka- takeoff manipud iti eropuerto idiay Louisville, Kentucky.
Inbatad ni Andy Beshear a karaman dagiti tallo a crew members ti eroplano ti mapapati a pimmusay kalpasan a kellaat a nauram ken timmalaw iti Louisville Muhammad Ali International Airport.
Adda ti agarup 11 nga indibidual ti nasugatan iti nasao nga insidente a nangitunda ti napuskol a nangisit nga asok iti tangatang.
Nagballaag dagiti otoridad a nagsagaba dagiti tattao ti nakana a sugat gapu iti insidente ken posible pay a ngumato ti bilang dagiti natay.
Mainaig iti daytoy, manarimaan pay laeng ti maiwaywayat a preliminary investigation ngem basar kadagiti otoridad a nasapa pay nga irakurak iti namunganayan ti insidente.
Maipalagip a segun iti Federal Aviation Administration, agturong idiay Hawaii ti UPS Flight 2976 idi napasamak ti insidente nga adda ti kargana a 380,000 gallons ti fuel nga adda ti kadagsenna a 220,000 pounds.
Immuna iti daytoy, inpakaammo ni Luisville Metro Police Department chief Paul Humphery, saan pay a nalawag no inton no nga agbalin a natalged nga iwayat ti imbestigasion iti crash site gapu ta adda dagiti narisgo a banag a maur-uram ken posible a bumtak.
