LAOAG CITY – Naiget nga itantandudu ti maysa a grupo dagiti Mechanical Engineering students ti Northwestern University ditoy siudad ti Laoag maipapan iti recycling ken waste reduction.
Segun ken ni Mr. Yrral John Magno, ti Project Leader ti Design and fabrication of reverse vending machine wenno “VENDOBIN” nga addaan ti plastic shredder para iti sustainable waste management a napanunutanda ti nasao a proyekto gapu iti kumarkaro a problema maipanggep iti waste pollution kangrunaanna ti single use plastic.
Inbatadna a ti disensio ti proyekto ket kas ti traditional met laeng a vending machine ngem ti konsepto daytoy ket naidumduma gapu ta reverse vending machine.
Inlawlawagna nga imbes nga alaen ti botelya iti nasao a machine ket mismo ti maysa nga indibidual ti mangikabil iti daytoy.
Kunana a ti proyektoda ket addaan ti plastic shredder no sadino ket posible a mapagbalin a polymer a mabalin nga usaren iti panagaramid kadagiti nagduduma a banag kas ti eco bricks, tugaw ken dadduma pay.
Inpalgakna a babaen iti daytoy ket mabalin pay a mapagbalin nga income generating project para iti sumaruno nga agad-adal.
Mainaig iti daytoy, kuna ni Magno nga adda ti sistema nga inaramidda a masapol a masurot tapno saan a basta laeng nga agikabil ti plastik no sadino kasapulan nga adda ti access card nga ikabil iti nasao a machine.
Inpakaammona nga adda ti sensor daytoy, umuna ti infrared sensor tapno madeterminar ti machine no plastik wenno saan ken no adda pay laeng ti nagianna wenno awan daytoy.
Inbagana a dumanon iti uneg ti innem a bulan sakbay a nabukel ken nalpasda ti nasao a proyekto.
Innayonna a planoda nga idasar daytoy iti Provincial Government of Ilocos Norte babaen iti Metro Ilocos Norte Council.
Kabayatanna, addan dagiti sumagmamano a barangay ti agsalsaludsod kadakuada maipapan iti nasao a proyekto.
