LAOAG CITY – Kinumpirmaran ni PLt.Col. Roldan Suitos, ti Hepe iti Philippine National Police iti ili ti Bacarra nga adda dagiti dadduma pay a rekord iti panangallilaw iti sabali a lugar ti suspek a kameng ti Lesbian, Gay, Bisexual, Transgender, Queer wenno LGBTQ Community.
Binigbig ni PLt.Col. Suitos ti suspek nga agtawen ti 31, awanan trabaho, residente idiay Ballesteros, Cagayan ngem agdama nga agnanaed iti Brgy. Salugan iti ili ti Currimao.
Basar iti inwayatda nga imbestigasion, adun dagiti tattao ti linuklukona ken agpampammarang pay kas Supervising Manager iti maysa a Business Process Outsourcing Company iti ili ti San Nicolas.
Inbatadna nga iti agdama ket agtultuloy pay laeng ti panangisayangkatda ti naun-uneg nga imbestigasion tapno matiliw ti nasao a suspek a posible a mapilaan ti kaso nga Estafa.
Maipalagip nga adda ti dua a Barangay Kagawad iti Brgy. 10 iti ili ti Bacarra ti nabiktima iti nadakamat a suspek kalpasan a nabudol dagitoy ti kuarta ken gadgets.
