LAOAG CITY – Kalikagom ti maysa a Konsehal idiay Coron, Palawan a maideklara a persona-non-grata ti dua a vlogger gapu iti iseserrek ken panangibabain da iti maysa nga staff ti opisina ti Mayor iti nasao a lugar.
Namunganay ti singasing ni Konsehal Juan Patricia Eyes kalpasan ti video nga inpost da Rendon Labador ken Rosmar Tan nga ung-ungtan da ni Jho Trinidad iti opisina ni Mayor Marjo Reyes.
Nammuan a nakapungtot dagiti dua a vlogger gapu iti inpost ni Trinidad a krinitikar na ti inorganisar da nga event a nakairamanan dagiti residente iti Coron.
Iti nasao a post, maipagarup a pinaguray da Rendon ken Rosmar dagiti tattao ken binaybay-anda a mabisinan dagitoy.
Gapu iti daytoy ket inbilin ti opisina ti mayor ti patas a panagimbestigar iti nasao nga insidente.
Nupay kasta ket nagkiddaw metten ni Trinidad ti pammakawan.
Kabayatanna, manamnama a mairuar ti desisyon iti office of the Mayor inton Hunyo 24 kalpasan ti regular session.
