LAOAG CITY – Inadmitir ti China a mannarimaan ti panangiplastarda iti joint military ken naval drill iti Russia iti makin-abagatan a paset ti China a maawagan iti Joint Sea-2024.
Maibasar iti statement nga inruar ti Chinese Defence Ministry, rinugian ti dua a pagilian ti military drill idi rugrigi daytoy a bulan ti Hulio’l ken agpaut agingga iti tengnga ti agdama a bulan.
Dakkel a paset daytoy a drill a maiwaywayat iti taaw ken iti tanagtang ti Zhanjiang City, iti Abagatan a probinsia ti Guangdong no sadinno a ditoy nga ipakpakita ti dua a pagilian ti kabaelanda a mangtaming kadagiti pangta iti baybay.
Ipakitana pay ti abilidad ti dua a pagilian a mangtaginayon iti sangalubongan pakairamanan ti Regional peace and stability.
Segun iti ministro, maisayangkat ti military drill, maibasar iti tinawen a plano ti China ken Russia a maaddaan iti military engagement.
Kagiddan daytoy a drill ket ti isasangpet ken panagtitipon dagiti missile destroyer, guided missile frigate, suplayer, ken dadduma pay nga alikamen ti militar iti Southern Coast ti China.
Inpakaammo daytoy ti China, kalpasan ti panagtataripnong dagiti lider ti National Atlantic Treaty Organization (NATO) idiay Washington, ni sadinno a pinasingkedan manen dagiti pagilian a kameng ti NATO ti suportada iti Ukraine.
Iti nasao a miting, nangiruar met ti NATO iti statement no sadinno nga inawaganna ti China kas ‘decisive enabler’ iti panangraut ti Russia iti Ukraine.
Daytoy a military drill ket maigiddan iti dati a nairugi a drill iti nagbaetan ti China ken Belarus, a pagaammo met nga alyado ti Russia.
