LAOAG CITY – Inrakurak ti Department of Education (DepEd) ti panangi-renew ken panangala na ti 7,062 nga administrative support staff para iti pampubliko a pagadalan iti intero a pagilian.
Gagem daytoy a makissayan dagiti trabaho pang-administratibo dagiti mangisursuro tapno ad-adda a matutukan da ti panagisuro da kas maiyataday iti direktiba ni Presidente Ferdinand R. Marcos Jr. a pasayaaten ti kalidad ti edukasyon ken salwadan ti pagsayaatan dagiti mangisursuro.
Naamoan a dagiti support staff ket maala iti babaen ti Contract of Service (CoS) a pondoan ti maintenance and other operating expenses (MOOE) ti Department of Education.
Ti sweldo dagitoy ket maibasar iti regional minimum wage para iti 22 nga aldaw ti trabaho iti kada bolan, karaman ti 12.5 porsyento a premium nga in-inut a mabayadan.
Karaman kadagiti agbalin a trabaho dagiti maseknan ket ti panagisagana kadagiti report, panangikoordinar dagiti programa ti pagadalan ken dadduma pay a clerical a trabaho.
Inlawlawag ti Department of Education a ti pannakairenew dagiti agdama nga staff ket nakadependar iti performance evaluation da, idinto a dagiti baro nga aplikante ket dumalan iti selection process.
Kasapulan nga addaan ti Senior High School diploma ken kabisado da ti Microsoft Office ken ti panagusar kadagiti kangrunaan a kagamitan iti opisina dagit kwalipikado nga aplikante.
