LAOAG CITY – Umabot iti 74 a ribo a pisos ti pakadagupan a balor ti naala ti mannanakaw manipod iti maysa a pagtaengan iti Brgy. 12 iti ili ti San Nicolas.
Daytoy ti inpakaammo ni PLt. Ashley Cacayorin, ti deputy chief of police iti PNP-San Nicolas.
Segun ken ni Cacayorin, nakita laengan ti agtagikua ti pagtaengan a ni Justo Acosta a naiwarang dagiti gamit apaman a nakariing itay agsapa.
Inbatad na a dita a naripar ti lakay a mapukpukaw ti nagduduma a gamit pakairamanan ti kwarta.
Kuna ni Cacayorin a naala dagiti mannanakaw ti 11 a ribo a pisos a kwarta a naipalaon iti dua a pouch, cellphone nga agbalor iti siyam a ribo a pisos, kwintas nga agbalor ti 19 a ribo a pisos, agbalor ti 20 a ribo a pisos nga aritos ken ti agbalor ti 18 a ribo a pisos a singsing.
Inbatad na a basar iti palawag ni Acosta, sigud nga awan ti lock ti ridaw iti likod ti pagtaenganda.
Gapu iti daytoy, patien ni Cacayorin a posible nga isu ti simrekan ken nagruaran ti mannanakaw.
Kabayatanna, kuna ti deputy chief of police a posible nga adda ti ideya ti mannanakaw iti pakaduktalan dagiti alahas ken kwarta gapu ta arig a kabisado na ti nagalaan na.
Innayun na a dagiti natakaw ket patulod ti anak ti lakay nga adda iti ballasiw taaw ken daytoy ket ilaklako na iti online.
Agpapan a maisursurat ti damag ket aswan met pay ti pamalpalatpatan iti posible a nangaramid ti panagtakaw.
Nu pay kasta, inpasigurado ni Cacayorin a maimbetigaran a naimbag iti nasao nga insidente.
