LAOAG CITY – Inbatad ni Police Major Joeffrey Taccad, ti pannakangiwat ti Ilocos Norte Police Provincial Office (INPPO) a nakairekordan ti 74 a road crash incidents ditoy probinsya sipud idi Enero agingga idi Abril 7 ita a tawen.
Inbaga na a manipod iti nasao a bilang ket tallo ditoy ti menor de edad, pito dagiti bikers, walo ti nakainom ti arak ken 11 dagiti awan ti lisensya na.
Gapu iti daytoy, inbalakad ni Taccad kadagiti riders a masapol nga agbalin da a responsable gapu ta kaadoan kadagiti madesdesgrasya ket nakamotorsiklo, nakainom ti arak ken awan ti lisensya na.
Malaksid iti road crash incident, inpakaammo ni Taccad nga adda pay ti tallo a drowning incident a nairekord da iti umuna a tallo a bolan ita a tawen.
Kabayatanna, inbaga ni Taccad nga awan ti dakes na no adda dagiti ubbing nga agbis-bisikleta iti kalsada basta kadwa da ti nagannak wenno adda ti kadwa da a nataengan.
Inbalakad na pay kadagiti agbis-bisikleta a masapol a kitaen da a naimbag ti pagdaldalyasatan da tapno maliklikan ti desgrasya.
Innayon ni Taccad nga uray iti panag-ehersisyo dagiti ubbing iti ruwar ket maipalubos basta adda kadwa da a nataengan ken saanda a basta agwarang-warang.
