LAOAG CITY – Umabot iti 762 a senior citizen manipud kadagiti 12 a barangay iti ili a Paoay ti immawat ti tulong pinansyal manipud iti gobierno probinsial.
Immawat ti kada senior citizen iti ili ti Paoay iti tallo ribo a pisos a social pension no sadinno a naiyuswat daytoy iti Paoay Civic Center.
Naamoan a dagiti benepisiario ket manipud iti Barangay Nagbacalan, Sungadan, Waig Upay, Nanggoyudan, Mumulaan, Monte , Callaguip, Surgui, Suba, Pasil, ken dua pay a barangay iti ili a Paoay.
Nagyamanan ti gobierno probinsial kadagiti senior citizens iti ili ti Paoay gapu iti nagbalin a kontribusion da ditoy probinsiya.
Nagyaman pay ti gobierno probinsial ken ni Department of Social Welfare and Development (DSWD) Secretary Rex Gathalian gapu ta adda ti nasao a programa a makatulong kadagiti senior citizen.
Inpakaamo iti Provincial communication office a saan laeng a dagiti taga Paoay ti mabunongan iti social pension no di ket amin nga ili ditoy probinsya.
Mangnamnama ti gobierno probinsial nga ad-adun to pay a tulong pinansyal ti maipaay kadagiti natataengan gapo ta maibilang dagiti senior citizen a teddek ti kagimongan a nasken a maipaayan iti tulong ken importansia kas panangipateg metten kadakuada.
