LAOAG CITY – Naragsak nga inpakaammo ti Department of Trade and Industry nga awan dagiti naduktalan da a naglabsing iti pagalagadan kabayatan ti panagbisita ken panagmonitor da kadagiti pasdek negosyo iti ili ti Bacarra ken Pasuquin.
Segun ken ni Mr. Dominador Alberto, ti Consumer Protection Division Head iti Department of Trade and Industry, umabot iti 77 a negosyo ti nabisita da kadagiti nadakamat nga ili.
Karaman kadagiti binisita da ket ti grocery ken convenience stores, novelty shop, hardware and construction supply, motor parts and repair shop, ken Bakeshop.
Mainaig iti daytoy, nagpalagip manen ni Alberto a masapol nga itultuloy ti panangsurot kadagiti pagannurutan tapno maliklikan a mapatawan ti pannusa.
