LAOAG CITY – Nalaingan ti 78 a pasyente a nagsagaba ti COVID-19 idinto a lima dagiti pimmusay ditoy probinsya.
Iti datus ti gobyerno probinsyal, ad-adu dagiti nalaingan mangipud iti COVID-19 ngem ti bilang dagiti baro a kaso sipud idi kalman.
Manipud iti bilang dagiti nagimbag, 37 a pasyente ditoy siudad ti Laoag dagiti nailista iti recoveries count, 25 iti ili ti Currimao, innem iti siudad ti Batac, sagtatallo iti Pagudpud ken Marcos, ken sagdudua iti Burgos ken Carasi.
Lima met dagiti pimmusay ditoy siudad.
Kabayatanna, nairekord ti 44 a baro a kaso ti COVID-19, 19 iti ili ti Bangui, pito iti ili ti Badoc, saggapat iti siudad ti Batac ken ditoy siudad ti Laoag, sagdudua iti Bacarra, Dingras ken San Nicolas, ken saggaysa iti Banna, Vintar, Piddig, ken Pasuquin.
Gapu iti daytoy, umaboten iti 7,051 ti kaso nga addaan ti 2,463 nga aktibo a kaso, 4,473 ti recoveries ken 115 dagiti pimmusay.
