LAOAG CITY – Inrakurak ti United Nations Human Rights Office nga umaboten iti 798 a tattao ti natay kadagiti lugar a pakaibunbunungan ti tulong ken iti aglawlaw ti humanitarian convoys iti Gaza.
Basar iti pannakangiwat ti United Nations Human Rights Office a ni Ravina Shamdasani, 615 ti maipagarop a natay iti asideg dagiti site ti Gaza Humanitarian Foundation (GHF) ken 183 kadagiti ruta a pagdaldalanan dagiti aid convoy.
Ti Gaza Humanitarian Foundation ket maysa nga organisasyon a suportado ti Estados Unidos ken Israel, a agus-usar ti private American security ken logistics firms tapno maiserrek dagiti tulong iti Gaza, a masansan a saan a dumaldalan iti UN-led aid system.
Kinondenar daytoy ti United Nation kas “inherently unsafe” ken mailabsing iti prinsipyo ti humanitarian impartiality.
Naamoan a sipud pay idi katapusan ti Mayo, nangrugi a nagibunong ti makan ti Gaza Humanitarian Foundation iti Gaza, ken naglikudan na nga adda dagiti napasamak nga insidente kadagiti site da.
