LAOAG CITY – Inpakaammo ni Mr. Noel Tablada, Provincial Director ti Fertilizer Pesticide Authority nga adda ti walo a brand ti ganagan a naipalubos laeng a mailako kadagiti mannalon ditoy probinsia.
Segun kenkuana, dagitoy ket ti Danat High-Yield Philippine Planters Urea, Urea Harvester, Perfect Gro, Yara Viking Ship Granular Urea, Marca Bulaklak, Swire Complete, Swire, HilPhos ken Amigo Planters.
Inbatadna a nasken laeng a kadagiti authorized dealer ti paggatangan ti ganagan tapno maliklikan a mabiktima ti peke a ganagan a mangitunda pay ti pannakadadael kadagiti mulada.
Inlawlawagna a nupay awan dagiti matiltiliwanda nga aglaklako ti peke a ganagan ngem saanda nga agpakampante tapno maipasigurado ti kinatalged dagiti produkto agrikultura ditoy probinsia.
Kunana nga adda dagiti maaw-awat ti opisinada a direkta nga agturong ken aglako kadagiti mannalon dagiti maipagarup nga aglaklako ti peke a ganagan.
Inlawlawagna a maysa kadagiti kangrunaan a pakalasinan ti pudno a ganagan ket ti packaging, labeling, registration number ken dadduma pay.
Innayonna a ngimmato ti presio ti ganagan ngem nakadepende no ania a klase daytoy.
