LAOAG CITY – Naggigidan a naglibas dagiti 8 a menor de edad a sumangsango ti kaso kriminal a nakakustodyar iti Bahay Pag-asa iti Brgy. 48 A Cabungaan ditoy ciudad ti Laoag.
Segun kenni Mrs. Perlita Cabello, ti mangidadaulo ti City Social Welfare and Development ditoy ciudad, bayat nga agbuybuya iti paputok dagiti nadakamat a menor de edad ken madama nga agtun-tuno dagiti dadduma iti pagsasangoan da para iti media noche ket kellaat lattan a nagigeddan dagitoy a nagtalaw.
Inpasingked ni Cabello nga awanen iti sapulen pay dagiti menor de edad agsipod ta matrat-tratar dagitoy a nasayaat.
Kunana a saan a napuutan dagiti agbanbatay agsipod ta maymaysa laeng a social worker ken guwardya ti mangkitkita kadagitoy.
Naamoan a dagiti 8 a nakalibas ket sumangsango da ti kaso a panagtakaw, rape, illegal a droga, murder ken dadduma pay a madama a madengdenggeg iti korte.
Inbatad na a posible a naplano iti panaglibas dagiti nadakamat a menor de edad.
Kabayatanna, awanen iti nadanon dagiti pamilya ti naglibas bayat a bisitaen da dagitoy iti Bahay Pag-asa.
Segun iti maysa nga ina a bimmisita a ni Mrs. Pizarro a taga Brgy. Navotas, saan dan a nakita ti agtawen 17 nga anak na apaman a mapan na bisitaen daytoy.
Kunana nga awan met iti naibagbaga ti anak na kenkuana a kayat na a pumanaw iti Bahay Pag-asa.
Naamoan 5 a bulanen nga adda iti Bahay Pag-asa ti anak na.
Iti agdama, manarimaan iti manhunt operation dagiti social workers, PNP ken Civil Security Unit (CSU).
Ti Bahay Pag-asa ket awan pay ti naestiblar nga inaladan na a mabalin a daytoy pay ti rason no apay a nagutigot dagiti maseknan nga aglibas.
