LAOAG CITY – Ballaigi ti naisayangkat a drug buy-bust operation iti nagbaetan ti Barangay 14 ken Barangay 15 iti ili ti San Nicolas babaen ti nagtitipon a pwersa ti PNP-Laoag, PNP-San Nicolas ken PDEU.
Nabigbig ti subject ti operasyon a ni Mr. Bernardo Rafada Jr., taga Barangay 7-B ditoy ciudad ti Laoag.
Inarestar a dagus dagiti otoridad ni Rafada kalpasan a naglako ti maysa a sachet a naglaon ti maipagarop a shabu nga agbalor ti sangaribo a pisos iti maysa a nagpammarang a police poseur buyer .
Malaksid iti inlako ni Rafada a maysa a sachet ket nakakumpiskar pay dagiti otoridad ti pito a sachet a naglaon met laeng ti maipagarop a shabu.
Iti pannakisarisarita ti Bombo Radyo ken ni Rafada, inpasingked na a saanna a kukua dagiti naala kenkuana.
Kuna na a napan laeng iti nasao a lugar tapno mapan agsingir.
Nupay kasta, inbatad ni Police Chief Master Sergeant Harold Nicolas iti PDEU, a gagangay laeng a paglikudan ni Rafada ti alegasyon kenkuana gapu ta ado ti naala da nga ebidensya.
Kinumpirmaran ni Nicolas a ti subject ti operasyon ket adda iti rank No. 12 iti Top 20 iti Provincial Level.
