LAOAG CITY – Aksidente a naitennag ti maysa a South Korean fighter jet dagiti bomba iti maysa a civilian area iti kangitingitan ti live-fire military exercises iti Pocheon, South Korea, a nakasugatan ti walo a tattao.
Iti maysa nga statement, inbatad ti South Korea air force, aksidente a naitennag ti KF-16 fighter jet ti MK-82 bombs iti ruwar ti maysa a firing range a nangitunda kadagiti perdisyon.
Ti nasao a fighter jet ket makipaspaset iti joint live-firing drills ti air force kadwa na ti army.
Segun iti Pocheon disaster response center, 6 a sibilyan ken dua a soldado ti nasugatan a dagitoy ket manarimaan a maag-agasan iti ospital.
Naamoan a dagiti uppat a nasugatan ket adda iti kritikal a kondisyon no sadinno a dua kadagitoy ket gangannaet, maysa a Thai idinto a ti maysa ket manipod iti Myanmar.
Nagresulta pay ti insidente iti pannakadadael ti tallo a balay, maysa a Catholic church ken maysa a greenhouse ngem saan a direkta a timama kadagitoy dagiti bomba.
Nagpadespensar ti air force iti insidente ken nagkari a mangipaay ti kompensasyon ken naan-anay nga addang iti napasamak.
Mangbukel pay ti air force ti committee ti agimbestigar no ania ti makaigapu ti aksidente ken kitaen a nasayaat ti kinalawa dagiti nadadael.
