LAOAG CITY – Inbatad ti National Disaster Risk Reduction and Management Council (NDRRMC) nga agarup umabot iti 8 nga indibidual ti naipadamag a pimmusay gapu iti epekto ti Habagat ken dagiti napalabas a bagyo a Luis ken Maymay.
Basar iti kaudian a datos ti ahensia, 2 a tattao ti natay idiay Rizal gapu iti panagreggaay ti daga; du2a idiay Batangas gapu iti pannakalmes ken pannakakuryente; 2 idiay Benguet gapu iti panagreggaay ti daga; ken dua idiay La Union gapu iti panagreggaay ti daga, pannakakuryente, ken pannakalmes.
Adda pay met maysa a mapukpukaw sadiay Batangas ken pito ti nasugatan idiay Benguet gapu iti panagreggaay ti daga ken aksidente iti lugan.
Kabayatanna, agtultuloy ti layus iti sumagmamano a paset ti Ilocos Region, Central Luzon, MIMAROPA, Cordillera Administrative Region, ken CALABARZON gapu iti di agpatingga a napigsa a tudo.
Idiay Marikina, nakadanon ti Marikina River iti maika-2 nga alarm level sakbay ti alas 11 ti bigat idi kalman, a nangtignay kadagiti umili nga agnanaed iti asideg ti karayan nga agbakwit.
Nasurok a 400 met nga indibidual ti nagkamang iti evacuation center iti Concepcion Integrated School.
Segun ken ni Marikina 1st District Representative Marcy Teodoro a saan a nagtinay ti Tumana Pumping Station ti insigida, isu a saan a dagus a nairuar ti danum ti layus iti Pasig River.
Malaksid iti daytoy, idiay La Trinidad, Benguet, nargaay ti maysa a paset ti Beckel Road gpu iti soil erosion nga epekto iti napigsa a tudo.
Iti pakabuklan, kinuna ti NDRRMC a nasurok a 124,000 a pamilia ti naapektaran iti nakaro a paniempo iti intero a pagilian.
Agarup 2,500 a pamilia met ti agdama nga adda kadagiti evacuation centers, idinto a 170 a balbalay ti nadadael. 13 kadagitoy ti naan-anay a nadadael.
