LAOAG CITY – Umabot iti walo nga indibidual ti natay kalpasan ti napasamak a landslide a nakagaburan ti pagadalan iti uneg ti refugee camp idiay Bangladesh.
Ti Islamic study centre iti coastal city ti Cox’s Bazar ket nagaburan kadagiti pitak ken debris, no sadinno a saan pay a masinunuo no mano amin ti bilang dagiti indibidual nga adda iti uneg ti pagadalan idi napasamak ti insidente.
Napasamak ti landslide gapu iti panagtudtudo na ti napigsa a nangrugi pay idi domingo, Hulyo 5.
Naamoan nga umabot iti nasurok a maysa a milyon a Rohingya dagiti agnanaed iti maibilang a kadakkelan a refugee settlement iti lubong, a dagitoy ket nagbakwit gapu iti military crackdown idiay Myanmar.
Karaman kadagiti natay ket ti pito nga estudyante ken maysa a mangisursuro.
