LAOAG CITY – Dagus nga inpatungpal ti Philippine National Police ti walo nga oras a duty ti tunggal pulis manipud iti 12 nga oras.
Segun ken ni Philippine National Police Chief Gen. Rommel Francisco Marbil, ti 12 nga oras a dati a duty dagiti pulis ket mangitunda iti kinaawan ti oras iti pamiliada.
Malaksid iti daytoy, mangitunda pay ti panagturog dagiti pulis kadagiti police station dagitoy.
Inbatad ni Marbil, daytoy ket paset metten ti nagbalin a pammilinna iti pannakai-deploy ti ad-adu pay a porsiento ti kapulisan kadagiti kalsada.
Immunan nga inmandar ti opisial a 85 a porsiento dagiti pulis ket nasken nga adda kadagiti kalsada ken mangisaysayangkat iti panagpatrolya.
Ti 85 a porsiento ket makaiyalokar ti 197,200 a pulis kadagiti kalsada ditoy pagilian.
Kuna ni Gen. Marbil, dagitoy ket maikkan ti walo nga oras laeng a duty tapno kalpasan ti panag-duty dagitoy ket makaawidda kadagiti pamiliada.
Innayonna a masapol dagiti pulis a makadua ti bukudda a pamilia ken saan nga iyimot daytoy iti liderato ti pulisia kadakuada.
