LAOAG CITY – Naipatuloden iti Commission on Elections (Comelec) ti maikadua a bansada ti automated counting machine a mausar para inton 2025 Midterm Elections.
Adda ti pakabuklan nga 8,640 ACMs ti naipatuloden ti South Korean firm a Miru Systems iti bodega ti Commission on Elections idiay Biñan, Laguna.
Basar iti Commission on Elections, ininspeksion ti ahensia ti tunggal ACM tapno maipasigurado ti kalidad dagitoy.
Naammoan nga aniaman a machines a saan a pumasa iti initial inspection ket maisubli tapno mapasukatan.
Innayon ti poll body, nangrugi a mangipatulod ti machines ti Miru idi Hulio.
Kabayatanna, naipatulod metten ti nasao a kompania ti 100% ti servers, printers ken laptops a mausar iti vote canvassing.
