LAOAG CITY – Umaboten iti siyam a tattao ti natay idinto a 54 a sabsabali dagiti nasugatan kalpasan a narpuug ti stage gapu iti napigsa nga angin bayat ti campaign rally ti maysa a presidential candidate idiay Mexico.
Inbatad ni Governor Samuel Garcia ti Nuevo Leon state, Mexico a karaman kadagiti natay ket ti menor de edad idinto a sumagmamano met kadagiti nasugatan ket adda dan iti natalged a kasasaad idinto a ti dadduma ket dumalan iti operasyon.
Segun iti presidential candidate a ni Jorge Álvarez Máynez, saan a nagsagaba ti aniaman a sugat iti insidente a napasamak bayat ti campaign event na iti northeastern city ti San Pedro Garza Garcia.
Mainaig iti daytoy, inpakaammo ti gobernador ti Nuevo Leon state ti Mexico nga agtultuloy ti rescue operations tapno masalbar ti biag ti sumagmamano nga indibidual a na-trap iti baba ti narpuug a platform.
