LAOAG CITY – Umabot iti siyam a tattao ti natay idinto nga 46 a sabsabali dagiti nasugatan iti pannakauram ti military ammunition depot idiay Chad.
Inbatad ni Health minister Abdelmadjid Abderahim a mapagam-amkan a manayunan pay ti bilang dagiti natay gapu ta kaadoan kadagiti nasugatan ket kritikal ti kondisyon da.
Segun iti opisyal, ti napasamak nga uram ket nagpaot iti 30 a minutos.
Ti weapons depot iti Goudji area ket isu ti main arsenal ti pagilyan ken asideg laeng daytoy ti military headquarters, pakairamanan ti French army base ken ti erupuerto.
Adda pay ti sumagmamano a residential houses iti nadakamat a lugar.
Mainaig iti daytoy, inbatad ni Foreign Minister Abderaman Koulamallah a ti napasamak nga uram ket aksidente laeng, ngem saanen a nangipaay ti detalye no dagiti pimmusay ket military personnel wenno sibilyan.
