LAOAG CITY – Saan a bumaba iti siam nga indibidual ti natay idinto a 13 ti nasugatan kalpasan ti panangpaltog ti maysa nga agtawen ti 13 nga estudiante iti Kahramanmaras province southern Turkey.
Basar iti imbestigasion, simrek ti Grade 8 student a suspek iti nasao a pagadalan nga adda ti intugotna a paltog a mapapati a kukua ti amana a dati a pulis.
Insigida a simrek iti dua a classroom ken saan a nagpangadua a nagpaputok ti paltog.
Iggem ti suspek ti lima a paltog ken pito a magazine no sadinno a natay ngem saan a nalawag no nagpakamatay daytoy.
Segun kadagiti otoridad, uppat kadagiti nasugatan ti adda iti kritikal a kondision iti agdama idinto nga innem ti adda iti Intensive Care Unit.
Sumagmamano kadagiti agad-adal ket maipagarup a limmagto manipud iti tawa ti pagadalan tapno makalibas iti pammaltog ti estudiante.
Inarestar dagiti otoridad ti ama ti suspek kabayatan nga agtultuloy ti imbestigasion iti insidente.
Nadakamat a ti pammaltog ket maysa nga aldaw kalpasan ti maysa pay nga insidente ti pammaltog iti sabali pay a pagadalan iti Sanliurfa province no sadinno a 16 nga indibidual ti nasugatan.
Nangipeksa ti pannakipagladingit ni Turkish President Recep Tayyip Erdogan ken kunana a mapagsungbat ti asinoman a mapaneknekan a nagkurang iti insidente.
