LAOAG CITY – Umabot iti siyam a police officers ti natay ken naruay a sabsabali dagiti mapukpukaw kalpasan ti iraraot dagiti armado a lallaki iti probinsya ti Balochistan iti Pakistan.
Segun ken ni Deputy Commissioner Abdul Quddus Achakzai, nagturong dagiti armado a lallaki iti lugar ken bigla lattan a pinaltu-paltugan da dagiti pulis nga agbanbantay iti construction site ti multi-billion rupee dam iti Ziarat district.
Naamoan a karaman kadagiti natay ket ti dua a senior officers iti Pakistan.
Agtultuloy ti search operation dagiti otoridad tapno mabirukan da dagiti mapukpukaw a personnel da.
Agpapan ita ket awan pay ti grupo a nangadmitir iti napasamak a panagraot iti probinsya ti Balochistan.
Mainaig iti daytoy, kinondenar ni Pakistani Interior Minister Mohsin Naqvi ti napasamak a panagatake ken inawagan na dagiti pimmusay nga opisyal kas “the pride of our nation”.
